ភ្នំពេញ៖ មន្ទីរប្រឆាំងគ្រឿងញៀន កាលពីថ្ងៃទី០៨ ខែសីហា ឆ្នាំ២០២៣ បង្ក្រាបបានក្រុមឧក្រិដ្ឋជន ចរាចរគ្រឿងញៀនឆ្លងដែន ពីតំបន់ត្រីកោណមាស ឆ្លងកាត់ឡាវចូលមកកម្ពុជា ស្ថិតនៅចំនួន ២ទីតាំង ដោយទីតាំងទី១ នៅផ្ទះសំណាក់កណ្តាលស្ទឹងព្រែកជ្រៃ ខណ្ឌដង្កោ និងទីតាំងទី២នៅបុរីជីបម៉ុងលែនសែនសុខ ខណ្ឌសែនសុខ រាជធានីភ្នំពេញ។

មន្ទីរប្រឆាំងគ្រឿងញៀនបានស្រាវជ្រាវលើករណីនេះចំនួនជាង ២ខែមកហើយ ទម្រាំតែឃាត់ខ្លួនបានជនសង្ស័យជនជាតិថៃ២នាក់នោះ ជាមួយនឹងរឹបអូសបានសារធាតុញៀនប្រភេទមេតំហ្វេតាមីន ចំនួន ៤៦៥ដុំ ស្មើទម្ងន់ ៤៦៥គីឡូក្រាម ៦៥១ក្រាម។

បច្ចុប្បន្នជនសង្ស័យ ព្រមទាំងវត្ថុតាងចាប់យកខាងលើ កម្លាំងជំនាញបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធី។

គូសរំលឹកថា កាលពីថ្ងៃទី០១ ខែសីហា ឆ្នាំ២០២៣ សមត្ថកិច្ចជំនាញនៃមន្ទីរប្រឆាំងគ្រឿងញៀនក៏បង្រ្កាបបានក្រុមឧក្រិដ្ឋជនជនជាតិចិនចំនួន ៦នាក់ពាក់ព័ន្ធនឹងករណីលួចឆ្លងដែនគ្រឿងញៀនខុសច្បាប់ផងដែរ គឺរហូតដល់ជាង ៧៨០គីឡូក្រាម ពីតំបន់ត្រីកោណមាស ឆ្លងកាត់ឡាវ-កម្ពុជាបន្តចេញទៅកោះតៃវ៉ាន់ និងប្រទេសចិនតាមលំហរសមុទ្រ៕